Details in Marathi

भैरवगड किल्ला

सातारा रत्नागिरीच्या सीमा रेषेवर पाटण तालुक्यात कोयनानगर पासून २०कि.मी. अंतरावर सह्याद्रीच्या पर्वतमाथ्यावर घनदाट जंगलाच्या निसर्गसानिध्यात शिवकालीन भैरवगड आहे. गडावरून कोकणाची नयनरम्य सौंदर्यसृष्टी पाहता येते . गडावर भैरवनाथाचे मंदिर असून छत्रपती शिवाजी महाराजांचा पूर्णाकृती पुतळा आहे .मुख्य गड मंदिरापासून कोकणबाजूच्या समोरच्या टेकडीवर आहे. गडावर जाण्यासाठी अवघड पायवाट असून ढासळलेल्या बुरुजांचे अवशेष आहेत . बुरुजावरून सह्याद्री पर्वताच्या रांगांचा विशेष नैसर्गिक ठेवा पहायला मिळतो . गडावर टेहळणी गुहा असून या गुहेपर्यंत जाण्यासाठी भुयारी मार्ग आहे . सध्या गुहेत जाता येत नाही .गडावर शिवकालीन पडक्या वाड्याचे अवशेष आहेत . गडाचा मार्गावर उभ्या कड्यात भुयारी पद्धतीने खोदलेले थंड पाण्याचे कुंड आहे. भैरवगडाकडे पायी भ्रमंती करण्याचा आनंद तर वेगळाच आहे. हेळगाव .मेंढेघर ,नाव पाथरपुंज , या गावामार्गे भैरव गडाकडे जाता येते. गडाच्या परिसरातून पाटण येथील गुणवंत गड,घेरा दतेगड,सहज नजरेस पडतात. गडाच्या कोकण पायथ्याशी पात्रे,माजुत्तरी,रातअंबे,तळावडे,बल्लारमाच,धनगरवाडा,गोऊळ हि चिपळूण तालुक्यातील गावे असून पाटण तालुक्यातील पातरपुंज,नाव या गावांचे गडावरील भैरवनाथ हे देवस्थान आहे.